काठमाडौँ । टी–२० विश्वकप खेल्नका लागि क्रिकेटर सन्दीप लामिछाने अमेरिका जाने तयारीमा रहेका छन् । यसअघि भिसा प्रक्रियाका कारण रोकिएका सन्दीप सम्भवत आजै अमेरिका जान सक्ने स्रोत बताउँछ । उनी अमेरिकी दूतावासबाट भिसा नपाएपछि अमेरिका जान पाएका थिएनन् ।
उनको अमेरिका जाने भिसाका लागि पहल भइरहेको थियो । जसअनुसार नेपालस्थित अमेरिकी राजदूतावासले आज अपराह्न ४ बजे सन्दीपसँग अन्तर्वार्ता लिने बुझिएको छ ।
विश्वकप खेल्न अमेरिका पठाउन सन्दीपलाई भिसा दिन भनी सरकारले नोट लेखिसकेको छ । भिसा मिलेमा सन्दीप आजै राति अमेरिका उड्ने छन् ।
बलात्कार मुद्दामा उच्च अदालत पाटनबाट सफाइ पाएपछि नेपाल क्रिकेट संघ क्यान (क्यान)ले सन्दीपलाई विश्वकपमा सामेल गराउने प्रक्रिया थालेको थियो ।
तर, अमेरिकी दूतावासले भिसा दिन अस्वीकार गरेपछि उनी जान पाइरहेका थिएनन् । सन्दीपलाई भिसा दिन माग गर्दै विभिन्न स्थानमा प्रदर्शन समेत गरिएका छन् ।
जुन १ देखि २९ तारिखसम्म अमेरिका र वेस्ट इन्डिजमा संयुक्त रूपमा आयोजना हुने टी–२० विश्वकपमा नेपाल समूह ‘डी’ मा रहेको छ । यस समूहमा नेपालसँगै दक्षिण अफ्रिका, श्रीलंका, बंगलादेश र नेदरल्यान्ड्स पनि छन् ।
नेपालले ४ जुनमा नेदरल्यान्ड्ससँग खेल्दै विश्वकपको सुरुवात गर्नेछ ।
