चितवन । चितवनको भरतपुरस्थित कल्याणपुरमा रहेको स्मल हेभन स्कुलको बसमा आगो लगाएको आरोपमा प्रहरीले एक जनालाई पक्राउ गरेको छ । पक्राउ पर्नेमा विश्वनाथ थारु हुन् ।
गत वैशाख ३० गते भरतपुर महानगरपालिका–५ कल्याणपुरस्थित स्मल हेभन स्कुलको बागमती प्रदेश ०६–००१ क ००४५ नम्बरको बसलाई भरतपुर–२० दद्रहनी पुलमा रोकी थारुको समूहले पेट्रोल बम प्रहार गरेको दाबी प्रहरीको छ ।
पक्राउ परेका थारु भरतपुर–२५ स्थित राष्ट्रिय माध्यमिक विद्यालय शोसीका विद्यालय व्यवस्थापन समिति अध्यक्षसमेत हुन् ।
तीन वटा मोटरसाइकलमा आएको ६ जनाको समूहले विद्यालयको बसमा आगो लगाएको थियो । आगो लाग्दा बस पूर्णरुपमा जलेको थियो ।
घटनामा संलग्न अन्य व्यक्तिहरुको खोजी भइरहेको उनले बताए ।
