एजेन्सी । प्रभासको आगामी फिल्म ‘सालार’सँग सम्बन्धित एउटा अपडेट सार्वजनिक भएको छ । रिपोर्टहरूलाई विश्वास गर्ने हो भने फिल्मको थिएटर अधिकार सम्झौता अलपत्र बनेको छ ।
यसको कारण यो हो कि निर्माताहरूले फिल्मको लागि २०० करोड भारु माग गरेका छन् । तर, अहिलेसम्म यस विषयमा निर्माण पक्षबाट कुनै प्रतिक्रिया आएको छैन ।
रिपोर्टका अनुसार सालारका निर्माताहरूले थिएट्रिकल अधिकारका लागि माग गरेको रकम आरआरआरका निर्माताहरूलाई दिइएको रकम बराबर छ । सालारको बजेट पनि २०० करोड नै छ ।
फिल्मको अधिकारका लागि निर्माताले तेलंगानामा ७२ करोड, सीड जिल्लामा ३५ करोड र आन्ध्र क्षेत्रमा ९० करोड माग गरेका छन् । तर, खरिददार निर्मातालाई यति ठूलो रकम तिर्न तयार छैनन् । यसको प्रमुख कारण प्रभासका अघिल्ला फिल्महरुको प्रदर्शन रहेको मानिन्छ ।
प्रभास प्यान इन्डिया स्टार भए पनि उनका पछिल्ला तीन फिल्म ‘साहो’, ‘राधेश्याम’ र ‘आदिपुरुष’ बक्स अफिसमा फ्लप भए । प्रभासले आफ्नो करियरमा बाहुबली फ्रेन्चाइजबाट स्टारडम पाएका थिए । उनको पछिल्लो हिट फिल्म ‘बाहुबली २’ सन् २०१७ मा रिलिज भएको थियो ।
सालारलाई केजीएफ फेम निर्देशक प्रशान्त नीलले निर्देशन गरेका हुन् । हालै यसको टिजर रिलिज भएको छ, जसलाई फ्यानहरुले मन पराएका छन् । फिल्मको पहिलो भाग २८ सेप्टेम्बरमा रिलिज हुनेछ । यसमा प्रभासका अलावा पृथ्वीराज सुकुमारन, श्रुति हसन, टिनु आनन्द र जगपति बाबुजस्ता कलाकारहरु देखिनेछन् ।
