काठमाडौँ । यसवर्षको मनसुन सुरु भएसँगै मनसुनजन्य विपद्बाट हालसम्म १९ जनाको मृत्यु भएको छ । विपद् पूर्वतयारी तथा प्रतिकार्य शाखा गृहमन्त्रालयका अनुसार गत जेठ ३१ गतेदेखि असार १८ गतेसम्म विभिन्न जिल्लामा १९ को मृत्यु भएको छ भने २५ जना बेपत्ता र १० घाइते भएका छन् । साथै ७४ वटा घरमा पूर्णरुपमा र ११८ घरमा आंशिक क्षति पुगेको छ ।
भोजपुरमा बाढीका कारण एक जना र नुवाकोटमा पहिरोका कारण एक जनाको मृत्य भएको छ । संखुवासभामा बाढी र पहिोका कारण ३ जनाको मृत्यु, १९ बेपत्ता र ३ जना घाइते भएका छन् । साथै उक्त जिल्लामा १२ घर पूर्णरुपमा क्षतिग्रस्त भएका छन् भने सात घरमा आंशिक क्षति पुगेको छ ।
ताप्लेजुङमा परिहोका कारण ३ जनाको मृत्यु भएको छ भने ३ जना बेपत्ता र ३ जना घाइते भएका छन् । उक्त स्थानमा ३२ घर पूर्णरुपमा क्षतिग्रस्त भएका छन् भने ८९ घरमा आंशिक क्षति पुगेको छ ।
पाँचथरमा ३ जनाको मृत्यु भएको छ भने ३ जना बेपत्ता छन् । साथै एक जना घाइते भएका छन् । उक्त स्थानमा १९ घर पूर्र्णरुपमा र २१ घर आंशिकरुपमा क्षतिग्रस्त भएका छन् । अबिरल वर्षाका कारण इलाममा एक घरमा पूर्णरुपमा क्षति भएको छ ।
गोरखामा पहिरोमा परी एक जनाको ज्यान गएको छ । भने तनहुँमा पहिरोका कारण २ जनाको मृत्यु र एक जना घाइते भएका छन् । ओखलढुंगामा हालसम्म पहिरोमा परी चार जनाको मृत्यु भएको छ । उक्त स्थानमा ३ घर पूर्णरुपमा र एक घर आंशिक रुपमा क्षतिग्रस्त भएका छन् ।
प्रतिकार्य शाखाका अनुसार सिन्धुलीमा बाढीका कारण एउटा घर पूर्णरुपमा क्षतिग्रस्त बनेको छ । साथै दैलेखमा २ र अछाममा एउटा घर पहिरो तथा अबिरल वर्षाले पूर्णरुपमा क्षतिग्रस्त बनाएको छ । जुम्लामा बाढीका कारण एक जनाको ज्यान गएका छ ।
शाखाका अनुसार रुकुमपूर्वा, कास्कीमा एक एक घरमा पूर्णरुपमा क्षति पुगेको छ । अछाममा एक जना घाइते र एउटा घरमा आंशिक क्षति पुगेको छ साथै रुपन्देहीमा पहिरोले एक जना घाइते भएका छन् ।
