काठमाडौं । इन्डियन प्रिमियर लिग (आईपीएल)मा आज सोमबार चेन्नाई सुपर किंग्स र रोयल च्यालेन्जर्स बेंग्लोर भिड्ने छन् ।
बेंग्लोरको घरेलु मैदान एम चेन्नास्वामीमा हुने खेल नेपाली समय अनुसार बेलुका ७:४५ बजेदेखि सुरु हुनेछ ।
बेंग्लोरले अघिल्लो खेलमा दिल्ली क्यापिटल्सविरुद्ध जित निकालेको थियो भने चेन्नाईलाई अन्तिम खेलमा राजस्थान रोयल्सले पराजित गरेको थियो।
दिल्लीविरुद्धको जितमा विराट कोहलीले शानदार अर्धशतक प्रहार गरेका थिए । यस्तै, आरसीबीका लागि डेब्यु गरेका विजयकुमार विशाकले पनि तीन विकेट लिएका थिए।
पछिल्लो म्याचमा चेन्नाईका डेभन कोनवेले पनि अर्धशतक बनाएका थिए । राजस्थानविरुद्धको खेलमा चेन्नाईका लागि अर्धशतक बनाउने उनी एकमात्र ब्याट्सम्यान थिए। यद्यपि एमएस धोनीले पनि अन्तिममा क्विकफायर गर्दै ३२ रन बनाए, तर उनी टोलीलाई जिताउन असफल भए ।
चेन्नाई र बेंग्लोरले यस सिजनमा खेलेका चार खेलहरूमा दुईमा जित हात पारेका छन् । चेन्नाई र बेंग्लोर अंक तालिकाको छैठौं र सातौं स्थानमा छन्। दुवै टोली सोमबार एकअर्कासँग भिड्दै शीर्ष पाँचमा पुग्ने लक्ष्य राखेका छन् । यस सिजनमा दुई टोलीबीचको यो पहिलो भेट हो ।
सम्भावित प्लेईङ– ११
रोयल च्यालेन्जर्स बैंगलोर:विराट कोहली, फाफ डु प्लेसिस (कप्तान), महिपाल लोमरर, ग्लेन म्याक्सवेल, शाहबाज अहमद, दिनेश कार्तिक (विकेट किपर), वेन पारनेल, वानिन्दु हसरंगा, हर्षल पटेल, विशाल विजयकुमार, मोहम्मद सिराज
चेन्नई सुपर किंग्स: डेभोन कोनवे, रुतुराज गायकवाड, अजिंक्य रहाणे, मोइन अली, अम्बाती रायुडु, रवीन्द्र जडेजा, एमएस धोनी (कप्तान), मिचेल सैन्टनर, महेश थेक्साना, आकाश सिंह, तुषार देशपांडे
हेड–टू– हेड:
चेन्नाई र बेंग्लोरले हालसम्म ३० खेल खेलेकोमा चेन्नाईले १९ खेल जितेको छ ।यस्तै, बेंग्लोरले १० खेल जित्दा एक खेल भने नतिजाविहिन भएको छ ।
