एजेन्सी । १९ औं ओभरमा दुई छक्का र रोहित शर्मा, इशान किशन र तिलक वर्माको उपयोगी इनिङ्सको आधारमा मुम्बई इन्डियन्सले इन्डियन प्रिमियर लिग (आईपीएल)–१६ मा पहिलो जित हात पारेको छ । अन्तिम बलसम्म चलेको रोमाञ्चक खेलमा पाँच पटकको च्याम्पियन मुम्बईले दिल्ली क्यापिटल्सलाई ६ विकेटले पराजित गरेको हो ।
टोलीलाई अन्तिम ओभरमा ५ रन बनाउनु परेको थियो तर दिल्लीका तिब्र गतिका बलर एनरिच नोर्त्याले आफ्नो कडा बलिङले २५.७५ करोडमा बिक्रि भएका ग्रीन डेभिडलाई बाँधेर राखे । रोहित शर्माको कप्तानीमा रहेको मुम्बईको टोलीले दिल्लीविरुद्ध पहिलो पटक १७०ं रनको लक्ष्य पछ्यायो । यो सिजनमा मुम्बईको पहिलो जित हो भने दिल्लीले लगातार चौथो खेलमा हार बेहोरेको छ ।
घरेलु मैदान अरुण जेटली स्टेडियममा टस जितेर ब्याटिङ गरेको दिल्लीले १९.४ ओभरमा १७२ रन बनाएको थियो । जवाफमा मुम्बईले २० ओभरमा ४ विकेट गुमाएर लक्ष्य पूरा गर्यो । मुम्बईलाई जितका लागि अन्तिम १२ बलमा २० रन आवश्यक थियो । क्यामरुन ग्रीन र टिम डेभिड क्रिजमा थिए । यस्तो अवस्थामा डेभिड वार्नरले बल मुस्ताफिजुर रहमानलाई दिए । रहमानले १९ औं ओभरको पहिलो तीन बलमा मात्र दुई रन दिए । अब ९ बलमा १८ रन बनाउन बाँकी थियो ।
यस्तो अवस्थामा १७.५० करोडमा टिममा भित्रिएका ग्रीनले डिप मिड विकेटमा स्लो बलमा छक्का प्रहार गरे । अब ८ बलमा १२ रन बाँकी हुँदा मुस्ताफिजुरले योर्कर हाने, जसमा क्यामरुनले सिंगल लिए । त्यसपछि टिम डेभिड स्ट्राइकमा आए । डेभिडले १९ औं ओभरको अन्तिम बलमा वाइड ओभर लङ अफमा छक्का प्रहार गरे । यसरी मुम्बईले अन्तिम ओभरमा ५ रन जोड्नु परेको थियो ।
दिल्लीले खेलमा राम्रो सुरुवात गरेको थियो । पावरप्लेमा टोलीले एक विकेट गुमाउँदा ५१ रन बनाएको थियो । शीर्ष ३ ब्याट्सम्यानले रन बनाए, तर आफ्नो इनिङ्सले त्यो प्रभाव छोड्न सकेनन् । , कप्तान डेभिड वार्नरले ४७ बलमा ५१, पृथ्वी शाले १० बलमा १५ र मनिष पाण्डेले १८ बलमा २६ रन बनाए । बीचका तीन ब्याट्सम्यानले ८ रन मात्र जोड्न सके । यस्तो अवस्थामा ७ नम्बरमा उत्रिएका अक्षर पटेलले २५ बलमा ५४ रन बनाएर टोलीको स्कोर १६० मा पुर्याएका थिए । अन्तिम दुई ओभरमा ७ रन मात्र जोड्दै दील्लीले ५ विकेट गुमाएको थियो ।
मुम्बईका पियुष चावला र जेसन बेहरेन्डर्फले ३–३ विकेट लिए । रिले मेरिडिथले २ र ऋतिक शोकिनले एक विकेट लिए । एक ब्याटर रन आउट भए । ओपनर रोहित शर्मा (४५ बलमा ६५) र इशान किशन (२६ बलमा ३१ रन)ले मुम्बईलाई बलियो सुरुवात गराए । किशन आउट भएपछि तिलक वर्माले पनि २९ बलमा ४१ रनको इनिङ खेले । रोहितले दुवैसँग अर्धशतकीय साझेदारी गरे । सूर्यकुमार यादवले खाता पनि खोल्न सकेनन् । अन्त्यमा टिम डेभिड १३ रनमा अविजित रहे र क्यामरुन ग्रीनले १७ रन बनाएर टोलीलाई ६ विकेटको जित दिलाए । दिल्लीका मुकेश कुमारले २ तथा मुस्ताफिजुर रहमानले १ विकेट लिए । एक ब्याटर रन आउट भए ।
मुम्बईका कप्तान रोहित शर्माले आईपीएलमा लामो समयपछि अर्धशतक बनाए । उनले पछिल्लो पटक २३ अप्रिल २०२१ मा पञ्जाब किंग्सविरुद्ध ५२ बलमा ६३ रनको इनिङ खेलेका थिए । उक्त इनिङ्सपछि रोहितले २४ इनिङ खेले तर एकमा पनि ५० भन्दा बढी रन बनाउन सकेका थिएनन् ।
आजको खेलः चेन्नई सुपर किंग्स भर्सेस राजस्थान रोयल्स, साँझ ७ः४५ बजे
