एजेन्सी । इन्डियन प्रिमियर लिग (आईपीएल)अन्तर्गत छैटौं खेलमा आज सोमबार चेन्नई सुपर किंग्स (सीएसके)ले एमए चिदम्बरम स्टेडियममा लखनऊ सुपर जायन्ट्स (एलएसजी)को सामना गर्दैछ । खेल साँझ ७ः४५ बजेबाट सुरु हुनेछ ।
पहिलो खेल हारेपछि चेन्नई यस सिजनमा जितको खाता खोल्ने लक्ष्यमा छ । अर्कोतर्फ सिजनको पहिलो जितपछि लखनउको मनोबल उच्च रहेको छ ।
चेन्नई सुपर किंग्स
चेन्नईले ४ वर्षपछि आफ्नो घरेलु मैदानमा खेल्नेछ । टोलीले अन्तिम पटक सन् २०१९ मा मुम्बईसँग आईपीएल खेलेको थियो। त्यसपछि कोरोनाका कारण चेपौकमा प्रतिस्पर्धा भएन ।
महेन्द्र सिंह धोनीको कप्तानीमा रहेको चेन्नई प्रतियोगिताको सबैभन्दा सफल टोली मध्ये एक हो । टोलीले प्रतियोगितामा मुम्बईपछि सबैभन्दा बढी ४ उपाधि जितेको छ । चेन्नई १३ मध्ये ११ सिजनमा प्लेअफमा पुगेको छ । यस्तै ९ पटक फाइनल खेलेको छ । यस सिजनको पहिलो खेलमा चेन्नई गुजरातसँग ५ विकेटले पराजित भएको थियो । टोली त्यो हार बिर्सेर यो खेलमा ध्यान केन्द्रित गर्न चाहन्छ ।
टोलीका ४ विदेशी खेलाडी आज डेभन कोनवे, बेन स्टोक्स, मोइन अली र मिचेल सान्टनर मैदानमा उत्रिन सक्छन् । महिश टेकशाना उपलब्ध छैनन् । यी बाहेक धोनी, ऋतुराज गायकवाड, रविन्द्र जडेजा, दीपक चाहर र शिवम दुबे जस्ता भारतीय खेलाडीले पनि टोलीलाई बलियो बनाइरहेका छन् ।
लखनउ सुपर जायन्ट्स
लखनउले यस सिजनको सुरुवात जितसँगै गरेको छ । घरेलु मैदानमा भएको पहिलो खेलमा दिल्लीलाई ५० रनले पराजित गरेको थियो ।
सिएसकेविरुद्धको ४ विदेशी खेलाडीमा काइल मेयर्स, निकोलस पूरन, मार्कस स्टोइनिस र मार्क वुड हुन सक्छन् । क्विन्टन डी कक उपलब्ध छैनन् । यी बाहेक रवि बिश्नोई, केएल राहुल र दीपक हुड्डा जस्ता भारतीय खेलाडीले पनि टोलीलाई बलियो बनाइरहेका छन् ।
केएल राहुलको कप्तानीमा रहेको लखनऊ सुपरजायन्ट्सको यो दोस्रो सिजन मात्र हो । पहिलो सिजनमा टोलीले क्वालिफायरमा पुगेर सबैलाई चकित बनाएको थियो । त्यसपछि लखनउ र चेन्नईको टोली लिग चरणमा एकपटक भिडेका थिए । उक्त खेल लखनउले जितेको थियो ।
