पाँच पटकको विश्वकप च्याम्पियन ब्राजिल अन्तर्राष्ट्रिय मैत्रीपूर्ण खेलमा पानामासँग बराबरीमा रोकिएको छ । शनिबार राति पोर्चुगलमा भएको खेलमा ब्राजिल पानामासँग १–१ गोलको बराबरीमा रोकिएको हो ।
खेलमा ब्राजिलले सुरुवाती अग्रता लिएरपनि जोगाउन सकेन । ३२औं मिनेटमा लुकास पाक्युटाले गोलगर्दै ब्राजीललाई अग्रता दिलाएका थिए । तर, ब्राजिलको अग्रता चार मिनेटमै तोडिएको थियो । पानामाका अडोल्फो माचाडोले ३६औं मिनेटमा बराबरी गोल फर्काए ।
विश्व वरियताको तेस्रो स्थानमा रहेको ब्राजिलले दोस्रो हाफमा थुप्रै अवसर पाएपनि गोल गर्न सकेन । पानमाले पनि राम्रा मौका गुमाएको थियो । ब्राजिलले दोस्रो रोजाईका खेलाडीलाई मौका दिएको थियो । ब्राजिलका नियमित कप्तान नेइमार चोटका कारण आराम गरिरहेका छन् ।
उनी यस खेलमा दर्शकको रुपमा सामेल भएका थिए । यसैगरी शनिबार रातिनै भएको मैत्रीपूर्ण खेलमा मलेसियाले अफगानिस्तानलाई २–१ गोलले हरायो । ओमान र सिंगापुरले १–१ गोलको बराबरी खेलेका छन् ।
