काठमाडौँ । इंग्लिस प्रिमियर लिग फुटबलमा चेल्सीले सानदार जित निकालेको छ ।
गएराति भएको खेलमा चेल्सीले वल्भ्सलाई उसकै घरेलु मैदानमा ६–२ गोलले पराजित गरेको हो । चेल्सीको फराकिलो जितमा नोनी मादुएकेले ह्याट्रिक गरे भने निकोलास ज्याक्सन, कोल पाल्मेर र जोआओ फेलिक्सले एक–एक गोल गरे । यता, वल्भ्सका म्थाथ्यु कुन्हा र जोर्गेन स्ट्रान्ड लार्सेनले गरेको गोल सान्त्वना गोल हुन पुग्यो ।
खेलको दोस्रो मिनेटमा नै ज्याक्सनको गोलबाट चेल्सीले खेलमा अग्रता बनाएको थियो । २७ औं मिनेटमा कुन्हाले गोल गर्दै वल्भ्सलाई १–१ को बराबरीमा ल्याए । ४५ औं मिनेटमा पाल्मेरले गोल गर्दै चेल्सीलाई २–१ गोलले अघि बढाए । इन्जुरी समयमा लार्सेनले गोल गरेपछि पहिलो हाफ २–२ गोलको बराबरीमा सकियो ।
दोस्रो हाफमा चेल्सीले चार गोल थप्यो । मादुएकेले ४९, ५८ र ६३ औं मिनेटमा गोल गर्दै ह्याट्रिक गरे भने फेलिक्सले ८० औं मिनेटमा गोल गर्दै चेल्सीलाई ६–२ को जित दिलाए । यसअघि पहिलो खेलमा हार बेहोरेको चेल्सीले यो जितसँगै ३ अंक बटुलेको छ । वल्भ्सको भने यो लगातार दोस्रो हार हो ।
