काठमाडौं । कागेश्वरी मनोहरा नगरपालिका–५, थलीमा मंगलबार बिहान एक जना पुरुष मृत फेला परेका थिए । भक्तपुर नगरपालिका–७, छालिङ घर भएका ५२ वर्षीय कृष्ण नगरकोटी थलीमा मृत फेला परेका हुन् ।
प्रहरीको प्रारम्भिक अनुसन्धानमा नगरकोटीलाई धारिलो हतियार प्रहार गरी हत्या गरेको जस्तो देखिएको जिल्ला प्रहरी परिसर काठमाडौंका एसपी तथा प्रवक्ता नवराज अधिकारीले जानकारी दिए ।
मंगलबार बिहान थलीमा शव देखेपछि स्थानीयले प्रहरीलाई खबर गरेका थिए । घटनास्थलमा प्रहरी पुग्दा कालो कपडाले मुख छोपेको र रगत बगिरहेको अवस्थामा पाईएको थियो ।
नगरकोटीका छोरा पनि फर्पिङमा घाइते अवस्थामा भेटिएको प्रहरीले जनाएको छ । घाइते अवस्थामा भेटिएका उनलाई प्रहरीले अनुसन्धानको लागि नियन्त्रणमा लिएको छ । साथै, प्रहरीले नगरकोटीकी छोरीलाई पनि बबरमहलबाट नियन्त्रणमा लिएको छ ।
घटनामा गहिरो अनुसन्धान भइरहेको प्रहरीले जनाएको छ ।
