एजेन्सी । यू–१९ विश्वकप क्रिकेटको फाइनलमा आज भारत र अष्ट्रेलियाबीच प्रतिस्पर्धा हुँदैछ । खेल बेनोनीको विलोमुर पार्कमा दिउँसो १ः४५ बजे सुरु हुनेछ । टस दिउँसो १ः१५ बजे हुनेछ ।
भारत र अष्ट्रेलिया तेस्रो पटक प्रतियोगिताको फाइनलमा भिड्दैछन् । यसअघि दुई देशबीच अन्डर–१९ विश्वकपको फाइनल दुई पटक खेलिएको थियो र दुवै पटक भारतले जितेको थियो ।
यू–१९ विश्वकप २०१८ को फाइनलमा भारतले अष्ट्रेलियालाई ८ विकेटले पराजित गरेको थियो । यस्तै, सन् २०१२ मा भारतले अस्ट्रेलियालाई ६ विकेटले हराएको थियो ।
यूथ ओडीआईमा भारतको प्रदर्शन अस्ट्रेलियाभन्दा राम्रो छ । दुई टोलीबीच हालसम्म ३७ युवा एकदिवसीय खेलहरू खेलिएका छन् । जसमध्ये भारतले २३ खेल जितेको छ भने अष्ट्रेलियाले १४ खेल जितेको छ ।
यू–१९ एकदिवसीय विश्वकपमा दुवै टोली ८ पटक आमनेसामने भएका छन् । यसमा पनि भारतको वर्चस्व रहेको छ । भारत ६ पटक विजयी हुँदा अष्ट्रेलिया मात्र २ खेलमा विजयी भएको छ ।
