काठमाडौं । चालू आर्थिक वर्षको ६ महिनामा नेपालले १ अर्ब ४१ करोड २९ लाख रुपैयाँको कुकुरको आहारा ‘डग च्यू’ निर्यात गरेको छ ।
चालू आर्थिक वर्ष २०८०/८१ को साउन देखि पसु मसान्तसम्ममा नेपालले २२ राष्ट्रहरुमा १ अर्ब ४१ करोड २९ लाख २६ हजार ‘डग च्यू’ निर्यात गरेको भन्सार विभागले जनाएको छ ।
‘डग च्यू’ चौरी गाई तथा गाईको दुधबाट बनाइने छुर्पीको प्रकार हो । जसको प्रयोग पश्चिमा मुलुकहरुमा कुकुर तथा बिरालोको आहारकारुपमा गरिन्छ । नेपालले अमेरिका, क्यानडा, बेलायत, जापान, हंकङ, ताईवान, सिंगापुर, नेदरल्याण्ड्स, ग्रिस, मलेसिया, दुबई, थाइल्याण्ड, फिलिपन्स, चाईना, फ्रान्स, न्युजल्याण्ड, कतार र इटाली लगायत २२ राष्ट्रहरुमा ‘डग च्यू’ पठाउने गरेको छ ।
विभागको तथ्यांकअनुसार चालू आर्थिक वर्ष २०८०/८१ को पुस महिनासम्म आइपुग्दा नेपालले ७ लाख ९ हजार केजी ‘डग च्यू’ को निर्यात गरि १ अर्ब ४१ करोड २९ लाख २६ हजार रुपैयाँ भित्र्याएको छ ।
