एजेन्सी । साम करन आईपीएल इतिहासका सबैभन्दा महँगा खेलाडी हुन् । उनलाई १८.५ करोडमा किनिएको थियो तर उनको प्रदर्शन भने खासै रहेन । तसर्थ पञ्जाब किंग्सले साम करनलाई रिलिज गर्न सक्छ ।
आईपीएल २०२४ का लागि खेलाडी लिलामी डिसेम्बर १९ मा दुबईमा हुनेछ । अर्कोतर्फ सनराइजर्स हैदरावादले इंग्ल्याण्डका ब्याट्सम्यान ह्यारी ब्रुकलाई पनि रिलिज गर्न सक्नेछ ।
आइपिएल २०२३ को लिलामीमा हैदरावादले ब्रुकलाई १३.२५ करोड भारुमा किनेको थियो । ब्रुकलाई लिनको लागि राजस्थान रोयल्स र रोयल च्यालेन्जर्स बैंगलोरबीच प्रतिस्पर्धा भएको थियो, तर अन्त्यमा हैदरावाद उनलाई लिन सफल भयो ।
तर, ब्रुकले प्रभाव पार्न सकेनन् । यस वर्ष आईपीएलका ११ खेलमा १ सय ४० को स्ट्राइक रेटमा एक शतक सहित कुल १९० रन बनाए । सनराइजर्स हैदरावादका लागि पछिल्ला केही सिजन राम्रो रहेन र टोली नकआउट दौडमा पनि पुग्न सकेन ।
यस वर्ष सनराइजर्सले समूहका १४ खेलमध्ये चारमा मात्रै जित हासिल गरेको थियो । रिपोर्टका अनुसार ब्रुकलाई रिलिज गर्दा लिलामीलाई ध्यानमा राख्दै सनराइजर्सको बजेट बढ्नेछ र उसले केही प्रतिभाशाली खेलाडीलाई टोलीमा समावेश गर्न सक्नेछन् ।
यसैबीच, चेन्नई सुपर किंग्सका स्टार अलराउन्डर बेन स्टोक्सले आईपीएल २०२४ मा नखेल्ने घोषणा गरिसकेका छन् ।
