काठमाडौँ । अभिनेता अनमोल केसी रिहा भएका छन् । केसीलाई उनका काका उज्वल केसीको जिम्मामा छाडिएको छ ।
काठमाडौँ जिल्ला अदालतले अभिनेता अनमोल केसीलाई तीन दिन हिरासतमा राखेर अनुसन्धान गर्न आज प्रहरीलाई अनुमति दिए पनि उनी हाजिरी जमानीमा रिहा भएका हुन् । केसीलाई हाजिरी जमानीमा रिहा गरिएको जिल्ला प्रहरी परिसर काठमाडौंका एसपी कुमोद ढुंगेलले जानकारी दिनुभयो ।
रिहा भएपछि केसी निर्माता सुनिलकुमार थापाको गाडी चढेर प्रहरी कार्यालयबाट बाहिरिएका छन् ।
शुक्रबार नेपाल प्रहरीको काठमाडौँ उपत्यका अपराध अनुसन्धान कार्यालयको टोलीले भक्तपुरको साँगाबाट उनलाई पक्राउ गरी आपराधिक विश्वासघात गरेको कसुरमा थप अनुसन्धानका लागि जिल्ला प्रहरी परिसर काठमाडौँमा बुझाएको थियो ।
हिजो बिदा परेकाले आज अभिनेता केसीलाई अदालतमा पेश गरिएकामा तीन दिनको म्याद थप भएको थियो । उनलाई अभिभावकको हाजिरी जमानीमा रिहा गरिएको बताइएको छ ।
चलचित्र ‘रावायण’मा खेल्नका लागि केसीले १० लाख रुपैयाँ लिएको तर सम्झौता गर्न पनि नमानेको र सुटिङमा पनि नआएको भनी जाहेरी परेपछि सोही जाहेरीका आधारमा पक्राउ गरिएको थियो ।
