काठमाडौँ । दिपेन्द्र के खनाल निर्देशित चलचित्र ‘पशुपति प्रसाद २ः भष्मे डन’ विश्वभर एकसाथ प्रदर्शन हुने भएको छ ।
फिल्मलाई अन्तर्राष्ट्रिय वितरण कम्पनी सेभेन सिजले विश्वव्यापी रूपमा प्रदर्शन गर्न लागेको हो । सोमबार निर्माण कम्पनी टुकी आर्टस र सभेन सिजबीच औपचारिक सम्झौता भएको छ ।
अमेरिकाका राष्ट्रिय सिनेमा चेनहरू रेगल सिनेमा, सिने मार्क, रिडिङ सिनेमा, सिने पोलिस लगायतका हलमा करिब १ हजारदेखि १ हजार २ सय शो हुनेछ ।
यस्तै, क्यानडामा १५० शो, बेलायतका विभिन्न हलमा ५ सय शो, अष्ट्रेलियामा ५ सय शो, मध्यपूर्वका विभिन्न देशहरुमा ७५० शो र जापानमा १ सय शो हुने विज्ञप्तीमार्फत जनाइएको छ ।
यो फिल्म दशैंको फूलपातीदेखि विश्वभर एकसाथ प्रदर्शन हुनेछ । फिल्ममा विपिन कार्की, सौगात मल्ल, स्वस्तिमा खड्का, वर्षा सिवाकोटी, प्रकाश घिमिरे, रविन्द्र सिंह बानियाँ, मिस्श्री थापा, सजन थापा मगरलगायत कलाकारको अभिनय रहेको छ ।
फिल्मको कथा लेखन र निर्माता पनि खगेन्द्र स्वयम् रहेका छन् । २०७३ सालमा रिलिज भएको फिल्म ‘पशुपति प्रसाद’ले दर्शकको राम्रो प्रतिक्रिया र साथ पाएको थियो ।
