एजेन्सी । इन्डियन प्रिमियर लिग (आईपीएल) अन्तर्गत आज बिहीबार लिग चरणको ५६ औँ खेल कोलकाता नाइट राइडर्स (केकेआर) र राजस्थान रोयल्स (आरआर)बीच हुँदैछ ।
खेल बेलुका ७ः४५ बजेदेखि कोलकाताको इडेन गार्डेन स्टेडियममा सुरु हुनेछ । यस मैदानमा राजस्थानको टोलीले कोलकातासँग ९ खेल खेलेको छ । जसमध्ये कोलकाताले ६ जित हात पारेको छ । राजस्थानले दुई खेल मात्र जितेको छ । यस्तै एउटा खेल भने रद्द भएको थियो ।
कोलकाताले यो सिजन हालसम्म खेलेका ११ खेलमध्ये ५ मा जित र ६ मा हार बेहोको छ । कोलकाता १० अंकसहित तालिकाको छैटौं स्थानमा छ ।
राजस्थानले पनि यो सिजन हालसम्म खेलेका ११ खेलमध्ये ५ जित र ६ हारेको छ । समान १० अंक रहेको राजस्थान रनरेटका आधारमा कोलकाता भन्दा एक स्थान माथि अर्थात् पाँचौं स्थानमा छ । राजस्थानले पछिल्ला तीन खेलमा हार बेहोरेको थियो ।
कोलकाता र राजस्थानबीचको समग्र हेड टु हेडको कुरा गर्दा यी दुई टोली २७ पटक भिडेका छन् । जसमा कोलकाताले १४ पटक र राजस्थानले १२ पटक खेल जितेको छ । एक खेल भने रद्द भएको थियो ।
कोलकाताको इडेन गार्डेनको पिच ब्याटिङका लागि चर्चित छ । यहाँ उच्च स्कोरिङ टी–२० खेलहरू भएका छन् । तर खेल अघि बढ्दै जाँदा, यसले बलरहरूलाई पनि मद्दत गर्न थाल्छ, विशेष गरी स्पिनरहरूलाई । आजको दिन कोलकाताको मौसम निकै तातो हुने भएको छ । कोलकातामा बिहीबारको तापक्रम २७ देखि ३८ डिग्री सेल्सियसको बीचमा रहनेछ ।
दुबै टिमका सम्भावित सुरुवाती–११
कोलकाता नाइट राइडर्सः नितिश राणा (कप्तान), भेंकटेश अय्यर, रहमानुल्लाह गुरबाज, आन्द्रे रसेल, सुनील नारायण, रिंकु सिंह, वैभव अरोरा, शार्दुल ठाकुर, हर्षित राणा, सुयश शर्मा र वरुण चक्रवर्ती ।
राजस्थान रोयल्सः सञ्जु सामसन (कप्तान), यशस्वी जैसवाल, जोस बटलर, जो रुट, ध्रुव जुरेल, शिमरोन हेटमायर, रविचन्द्रन आश्विन, मुरुगन अश्विन, सन्दीप शर्मा, कुलदीप यादव र युजवेन्द्र चहल ।
