एजेन्सी । इन्डियन प्रिमियर लिग (आईपीएल) –२०२३ को निकै रोमाञ्चक खेलमा सनराइजर्स हैदरावादले राजस्थान रोयल्सलाई ४ विकेटले पराजित गरेको छ ।
सन्दीप शर्माको ओभरमा खेलको अन्तिम बलमा हैदरावादले बोनसको रूपमा पाएको फ्रि हिटले खेलको पासा पल्टियो ।
हैदरावादलाई अन्तिम बलमा ५ रन चाहिएको थियो, जब सन्दीप शर्माको २० औं ओभरको अन्तिम बलमा अब्दुल समद समातिए पनि बाहिरिएनन् ।
यहाँ अम्पायरले ‘नो बल’को संकेत दिए । अब टोलीले एक बलमा ४ रन बनाउनु परेको थियो जसलाई अब्दुल समदले छक्का हानेर खेल हैदरावादलाई जिताए ।
हैदरावादले पहिलो पटक २०० माथिको रनको लक्ष्य पछ्यायो । २०० माथिको रनको लक्ष्य पछ्याउँदै टोलीले ११ खेल गुमाएको थियो ।
यो जितसँगै हैदरावादले प्लेअफमा प्रवेश गर्ने आशा जीवित राखेको छ । टोलीले प्लेअफ प्रवेशका लागि बाँकी सबै खेल जित्नुपर्नेछ । जारी सिजनमा हैदरावादको यो चौथो जित हो । टोलीको खातामा ८ अंक छ ।
जयपुरको सवाई मानसिंह स्टेडियममा पहिले ब्याटिङ गरेको राजस्थानले २० ओभरमा २ विकेट गुमाएर २१४ रन बनाएको थियो । हैदरावादका ब्याट्सम्यानले २० ओभरमा ६ विकेट गुमाएर २१५ रनको लक्ष्य पुरा गरेका थिए । १९ औं ओभरमा तीन छक्का र एक चौका प्रहार गर्ने ग्लेन फिलिप्स प्लेयर अफ दि म्याच भए ।
पहिले ब्याटिङ गरेको राजस्थानका शीर्ष ३ ब्याट्सम्यानले दमदार रन बनाए । ओपनर यशस्वी जैसवालले ३५, जोस बटलरले ९५ र कप्तान सञ्जु सामसनले अविजित ६६ रन बनाए । हैदरावादका भुवनेश्वर कुमार र मार्को यानसेनले एक–एक विकेट लिए ।
जवाफी इनिङ्समा अनमोलप्रीत सिंह (३३ रन) र अभिषेक शर्मा (५५ रन)ले हैदरावादलाई सुखद सुरुवात गराए । मध्यक्रममा राहुल त्रिपाठीले ४७ रनको योगदान दिए । त्यसपछि हेनरिक क्लासेनले १२ बलमा २६ रन र ग्लेन फिलिप्सले ७ बलमा २५ रन बनाएर आफ्नो टोलीलाई लक्ष्यको नजिक पुर्याएका थिए । अब्दुल समदको ७ बलमा १७ रनको पारीले बाँकी काम गर्यो ।
राजस्थानका लागि युजभेन्द्र चहलले ४, कुलदीप यादव र रविचन्द्रन आश्विनले एक–एक विकेट लिए ।
