काठमाडौँ । राष्ट्रपतिको निर्वाचन मिति नजिकिँदै जाँदा राजनीतिक दलका शीर्ष नेताबीच आन्तरिक छलफलले तीव्रता पाएको छ । शीर्ष नेताबीच दिनहुँ ‘सामूहिक’ एवं ‘वान टु वान’ छलफल बढ्दै गइरहेको भए पनि सहमतिको मिलनबिन्दु भेटिएको छैन् ।
सत्तारूढका साथै प्रतिपक्षी दलका शीर्ष नेताबीच छलफल चलिरहेको छ । सत्ता साझेदार दलले गठन गरेको उच्चस्तरीय राजनीतिक संयन्त्रको बैठकमा शुक्रबार राष्ट्रपति निर्वाचनबारे छलफल भएको छ ।
राष्ट्रिय प्रजातन्त्र पार्टी (राप्रपा)का अध्यक्ष एवं उपप्रधान तथा ऊर्जामन्त्री राजेन्द्र लिङ्देनले राष्ट्रपति निर्वाचनको खास छलफल गर्नुपर्ने विषय केही नभएको प्रतिक्रिया दिए । बैठकमा सरकारको कामको समीक्षा गर्दै अगामी दिनमा सरकारका काम थप प्रभावकारी कसरी बनाउनेबारे छलफल भएको उनले बताए ।
‘राष्ट्रपति चुनाव’ छलफल गर्नुपर्ने कुरै के छ र ? सबै पहिले नै तय भइसकेको कुरामा छलफल आवश्यक भएन नि,’ लिङदेनले भने, ‘अहिलेसम्म सरकारले गरेका कामलगायत समीक्षा भयो । अब कसरी अगाडि बढ्ने भन्नेमा पनि छलफल भयो ।’
लिङ्देनले भनेजस्तै राष्ट्रपति निर्वाचनमा थप छलफल गर्नुपर्ने आवश्यक छैन । सरकार गठन गर्नुभन्दा अघि सत्तारूढ दलबीच भएको सहमतिअनुसार माओवादी केन्द्रले प्रधानमन्त्री र एमालेले राष्ट्रपति, सभामुखसहितका पदमा भागबन्डा भइसकेको छ ।
तर, उच्चस्तरी संयन्त्रको बैठकमा राष्ट्रपति निर्वाचनको विषय लिएर प्रधानमन्त्री पुष्पकमल दाहाल ‘प्रचण्ड’ र एमाले अध्यक्ष केपी शर्मा ओलीका बीचमा ‘भनाभन’ भएको छ । बैठकमा सहभागी एक नेताका अनुसार प्रधानमन्त्री प्रचण्डले राष्ट्रपतिको चयन राष्ट्रिय सहमतिमा गर्नुपर्ने आवश्यक्ताबारे बोल्दै गर्दा एमाले अध्यक्ष ओलीले प्रतिवाद गरेका छन् ।
‘प्रधानमन्त्री प्रचण्डको चाहना राष्ट्रपतिको चयन राष्ट्रिय सहमतिमा साझा व्यक्तिलाई ल्याउनुपर्नेमा छलफल गर्नु थियो’ ती नेताले भने, ‘तर एमाले अध्यक्ष ओलीले यसमा अब सल्लाह गर्नुपर्ने विषय नै के छ र ? यस विषय त पहिल्यै टुंगो लागिसकेकाले थप छलफलको आवश्यकता नै छैन ।’
माओवादी केन्द्रको स्थायी कमिटी बैठकले राष्ट्रिय सहमतिमा राष्ट्रपति चयन गर्नुपर्ने निर्णय गरिसकेको छ । तर, सोभन्दा अघि सत्तारूढ दलबीच सरकार गठनअघि नै राष्ट्रपति एमालेको भागमा परेको र त्यसमा सहमति भइसकेको छ । तर, माओवादी केन्द्रको केन्द्रीय कमिटी बैठकलाई सम्बोधन गर्दै राष्ट्रपति दलका कार्यकर्ता राष्ट्रपति हुँदा विगतमा दुःख पाएको टिप्पणी गर्दै साझा व्यक्तिको खोजी गर्दै राष्ट्रिय सहमतिमै चयन गर्नुपर्नेमा जोड दिएका थिए ।
उता, संसद् बैठकबाट बाहिरिँदै गर्दा एमाले अध्यक्ष ओलीले एमालेले भनेकै व्यक्ति राष्ट्रपति हुने टिप्पणी गरेका छन् । एमालेले आफ्नो भागमा परेको राष्ट्रपति पाउनुपर्ने र विगतको समझदारी कार्यान्वयन हुनुपर्नेमा जोड दिँदै आएको छ ।
उच्चस्तरी संयन्त्रको बैठकमा एमाले अध्यक्ष ओलीले राष्ट्रिय स्वतन्त्र पार्टी (रास्वपा) सरकारबाट बाहिरिए पनि पुनः सरकारमा भित्र्याउनुपर्ने सुझाव प्रधानमन्त्री प्रचण्डलाई बैठकमा दिए । तर, प्रधानमन्त्री प्रचण्डले उनको सुझाव त सुने तर कुनै प्रकारको जवाफ नदिई मौन बसिरहेका थिए ।
उच्चस्तरी संयन्त्रका संयोजकसमेत रहेका एमाले अध्यक्ष ओलीले सत्तारूढ गठबन्धनलाई थप बलियो बनाउँदै अगाडि बढ्नुको विकल्प नभएको बैठकमा राखेका थिए । बैठक बस्नुभन्दा अघि प्रधानमन्त्री प्रचण्ड र एमाले अध्यक्ष ओलीका बीचमा पटकपटक छलफल भएको थियो ।
बिहीबार नै संयन्त्रको बैठक बस्ने भनिएको थियो । तर, कार्यव्यस्तताका कारण बैठक शुक्रबार बस्यो । राष्ट्रपतिको निर्वाचनसहित समसामयिक राजनीतिको विषयमा प्रचण्ड र ओलीबीच पछिल्लो समय प्रायः दिनहुँ छलफल हुँदै आएको छ । आगामी २५ फागुनमा राष्ट्रपति चयनका लागि निर्वाचन हुँदै छ ।
ओली र ठाकुरबीच छलफल
यसैबीच शुक्रबार नै एमाले अध्यक्ष ओली र लोकतान्त्रिक समाजवादी पार्टी नेपाल (लोसपा)का अध्यक्ष महन्थ ठाकुरबीच छलफल भएको छ । राष्ट्रपतिको निर्वाचनसहित पछिल्लो राजनीतिक अवस्थालगायत छलफल भएको बताइएको छ ।
ओली निवास बालकोटमा दुई नेताबीच भएको हो । संसद् भवन बानेश्वरबाट ओली र ठाकुर एउटै गाडीमा बालकोट पुगेका थिए । ओलीले आफ्नै गाडीमा ठाकुरलाई लिएर बालकोट पुगेका हुन् । लोसपाले प्रचण्ड नेतृत्वको सरकार गठनको बेला समर्थन नगरे पनि विश्वासको मत दिएको छ ।
प्रचण्ड, नेपाल र खनालबीच छलफल
यसैबीच, प्रधानमन्त्री प्रचण्ड, नेकपा (एकीकृत समाजवादी)का अध्यक्ष माधवकुमार नेपाल, सम्मानित नेता झलनाथ खनालबीच छलफल भएको छ । सिंहदरबारमा तीन नेताबीच छलफल चल्दै गर्दा बीचमै राष्ट्रिय जनमोर्चाका अध्यक्ष चित्रबहादुर केसीसमेत मिसिएका थिए ।
पार्टी एकता वा मोर्चाबन्दीबीच ती दलबीच छलफल चल्दै गर्दा अगामी राष्ट्रपतिको निर्वाचनको समेत छलफल भएको स्रोतले जनाएको छ । यसअघि समेत प्रधानमन्त्री प्रचण्ड, एकीकृत समाजवादीका अध्यक्ष नेपालका साथै जनता समाजवादी पार्टी नेपाल (जसपा) अध्यक्ष उपेन्द्र यादवबीच समेत छलफल भएको छ ।
राष्ट्रपति निर्वाचन, पछिल्लो राजनीतिक अवस्था तथा पार्टी एकीकरण एवं मोर्चाबन्दीबारे छलफल भइरहेको प्रधानमन्त्री प्रचण्डको सचिवालयले जनाएको छ । वार्ता टोलीबीच भएको प्रगति तथा एकतालाई कसरी सहज बनाउँदै अगाडि बढ्ने भन्नेमा नेताबीच छलफल चलिरहेको बताइएको छ ।
देउवा र नेपालबीचमा छलफल
यसैबीच प्रमुख प्रतिपक्षी नेपाली कांग्रेसका अध्यक्ष शेरबहादुर देउवा र एकीकृत समाजवादीका अध्यक्ष नेपालबीच समेत शुक्रबार छलफल भएको छ ।
कांग्रेस सभापति देउवालाई भेट्न एकीकृत समाजवादीका अध्यक्ष नेपाल देउवा निवास धुम्बाराही पुगेका थिए । देउवा र नेपालबीच राष्ट्रपति निर्वाचन र पछिल्लो राजनीतिक अवस्थालगायत विषयमा छलफल भएको छ । राजधानी दैनिक
