काठमाडौँ । राष्ट्रिय जनमोर्चाका अध्यक्ष एवं सांसद चित्रबहादुर केसीले प्रधानमन्त्रीको चुनावमा नाटक देखिएको बताउनुभएको छ ।
प्रतिनिधिसभाको बिहीबारको बैठकमा उहाँले लोकतन्त्रमा सत्तापक्ष र प्रतिपक्षी हुने भए पनि प्रधानमन्त्रीको चुनावमा नाटक देखाएको बताउनुभयो ।
संसद्मा सत्तापक्ष र प्रतिपक्षी हुन्छ भन्दै उहाँले तर प्रधानमन्त्रीको चुनावमा नेपाली कांग्रेस प्रतिपक्षमा भए पनि प्रधानमन्त्रीलाई विश्वासको मत दिएर नाटक देखाएको बताउनुभयो ।
चुनावमा गरिएका वाचा दल र नेताहरूले बिर्सिएर गठबन्धन बनाएको भन्दै अध्यक्ष केसीले नेपालको लोकतन्त्र धराप परेको र यसलाई बचाउन आवश्यक रहेको बताउनुभयो ।
उहाँले सभामुख पदमा नेपाली कांग्रेसका उम्मेदवार ईश्वरी न्यौपानेलाई समर्थन गर्ने जानकारी दिनुभयो । उहाँले भन्नुभयो, “जे भए पनि जस्तो भए पनि छातीमा मुड्कीले हानेर ईश्वरीलाई समर्थन गर्छौं ।”
