काठमाडौँ । नेपाली कांग्रेसका नेता एवं समाजवादी चिन्तक प्रदीप गिरीको निधन भएको छ । स्वर्गीय गिरीको पार्थिव शरीरलाई केही समय मेडिसिटी अस्पतालमा राखिएको थियो भने त्यसपछि नेपाली कांग्रेस पार्टी केन्द्रीय कार्यालय सानेपामा राखिएको थियो । उहाँको आजै पशुपतिस्थित आर्यघाटमा अन्त्येष्टि गरिदैछ ।
स्वर्गीय गिरीप्रति श्रद्धाञ्जली व्यक्त गर्न उहाँको पार्थिव शरीर राखिएको मेडिसिटी अस्पताल, पार्टी कार्यालय सानेपामा विभिन्न पार्टीका नेताहरुका साथै शुभेच्छुकहरु पुग्नुभएको थियो ।
मेडिसिटी अस्पतालमा श्रद्धाञ्जली व्यक्त गर्न पूर्वराष्ट्रपति डा रामवरण यादव, नेपाली कांग्रेसका उपसभापति पूर्णबहादुर खड्का, महामन्त्री गगनकुमार थापा, गृहमन्त्री बालकृष्ण खाण, कांग्रेस नेता डा शेखर कोइराला, अर्थमन्त्री जनार्दन शर्मा, बागमती प्रदेशका मुख्यमन्त्री राजेन्द्रप्रसाद पाण्डे पुग्नुभएको थियो ।
उहाँको पार्थिव शरीर अस्पतालबाट केहीबेरपछि पार्टी कार्यालय सानेपा पु¥याइएको थियो । सानेपामा राखिएको गिरीको पार्थिव शरीरमा प्रधानमन्त्री एवं नेपाली कांग्रेसका सभापति शेरबहादुर देउवाले पार्टीको चारतारे झण्डा ओढाएर उहाँप्रति श्रद्धाञ्जली र सम्मान अपर्ण गर्नुभयो ।
यस्तै पार्टीका वरिष्ठ नेता रामचन्द्र पौडेल, उपसभापतिद्वय पूर्णबहादुर खड्का र धनराज गुरुङ, महामन्त्री गगन थापालगायतले गिरीप्रति श्रद्धाञ्जली अर्पण गर्नुभयो ।
सानेपामा गिरीप्रति श्रद्धाञ्जली व्यक्त गर्न सभामुख अग्नि सापकोटा, नेकपा (माओवादी केन्द्र) का अध्यक्ष पुष्पकमल दाहाल र नेकपा (एकीकृत समाजवादी) का अध्यक्ष माधवकुमार नेपाल ,राप्रपा नेता पशुपति समशेर राणा , पूर्व प्रधानमन्त्री डा बाबुराम भट्टराई , उर्जामन्त्री पम्फा भुषाल लगायत तथा अन्य पार्टीका नेता तथा कार्यकर्ताहरु पनि पुग्नुभएको थियो ।
स्वर्गीय गिरीलाई श्रद्धाञ्जली दिन कांग्रेस पार्टीका नेता तथा कार्यकर्ता, अन्य पार्टीका शुभचिन्तक, बुद्धिजीवी, शुभेच्छुक तथा पत्रकारलगायतको अस्पताल परिसर र पार्टी कार्यालय सानेपामा घुइँचो लागेको थियो ।
