काठमाडौँ । प्रहरीले हनी ट्रयापमा संलग्न २ जनालाई पक्राउ गरेको छ । सामाजिक सञ्जालमार्फत योजनाबद्ध तवरले पुरुषसँग सम्पर्क बढाउने र त्यसपछि बार्गेनिङ गरेर रकम असुल्ने कार्यमा संलग्न दुई जनालाई प्रहरीले पक्राउ गरेको हो ।
पक्राउ पर्नेमा सिन्धुपाल्चोकका तेन्जी डोमा छिरिङ भनिने सिर्जना तामाङ र सौरभ तामाङ भन्ने लिला बहादुर तामाङ रहेका छन् ।
अनुसन्धानमा लिला बहादुर तामाङले पीडितलाई सिर्जनासँग साथी बन्न लगाएको र फेसबुक मेसेन्जरबाट पीडितसँग कुरा गरी भेट्नलाई आफ्नो कोठामा बोलाएर अश्लील भिडिओ रेकर्ड गरेको खुलेको छ ।
त्यसपछि उक्त भिडियो सिर्जना र सौरभले पीडितलाई पठाई पीडितसँग १ करोडको बार्गेनिङ गरेको खुलेको छ । पछि १५ लाखमा कुरा मिलाएको प्रहरी अनुसन्धानबाट खुलेको छ ।
पक्राउ परेकाहरूलाई थप अनुसन्धानका लागि जिल्ला प्रहरी परिसर काठमाडौँ पठाइएको छ ।
