काठमाडौँ । सुदूरपश्चिम प्रदेशका मुख्यमन्त्री कमलबहादुर शाहले प्रधानमन्त्री पुष्पकमल दाहाल प्रचण्डसँग बालुवाटारमा भेटवार्ता गर्नुभएको छ । भेटपछि उहाँले छिट्टै प्रदेश सरकार विस्तार हुने बताउनुभयो ।
गत माग २६ गते मुख्यमन्त्रीमा नियुक्त भएका शाहले सोमबार बिहान माओवादीका प्रदेशसभा सदस्यहरुसहित सरकार विस्तारबारे प्रधानमन्त्री प्रचण्डसँग छलफल गर्नुभएको हो ।
आफूले प्रधानमन्त्रीलाई प्रदेश सरकार विस्तारबारे कुरा राखेको जानकारी दिँदै मुख्यमन्त्री शाहले गठबन्धनको कार्यदलमा शीर्ष नेताहरु छलफल गरेर टुंग्याउने भनेको उल्लेख गर्नुभयो ।
गठबन्धनमा आबद्ध दलहरुको शीर्ष तहमा छलफल भएपछि पार्टीबाट आउने निर्देशनअनुसार अघि बढ्ने उहाँको भनाइ थियो । उहाँका अनुसार आज वा भोलिमै सरकार विस्तार हुनेछ ।
आगामी वर्षको बजेट तयार गर्नुपर्ने भएकाले मन्त्रिपरिषद् विस्तारका लागि वातावरण बनाइदिन आफूले प्रधानमन्त्रीसँग आग्रह गरेको उहाँले जानकारी दिनुभयो ।
