एजेन्सी । आईपीएल २०२३ को २८ औं खेलमा दिल्ली क्यापिटल्सले कोलकाता नाइट राइडर्सलाई चार विकेटले पराजित गरेको छ । टस हारेर पहिले ब्याटिङ गरेको कोलकाताले २० ओभरमा १२७ रन बनाएको थियो । जेसन रोयले ३९ बलमा ४३ रन र आन्द्रे रसेलले ३१ बलमा ३८ रनको अविजित इनिङ खेले । जवाफमा १२८ रनको लक्ष्य पछ्याएको दिल्लीको टोली एक समय सहजै जिततर्फ अघि बढिरहेको थियो ।
डेभिड वार्नर ५७ रन बनाएर आउट भए । तर, यसपछि पनि नियमित विकेटहरू ध्वस्त भइरहँदा कोलकाता खेलमा फर्कियो । अन्त्यमा दिल्लीलाई ६ बलमा ७ रन आवश्यक थियो । अक्षर पटेलले जित दिलाए । अक्षरले २२ बलमा १९ रनको अविजित इनिङ खेले । यस्तै, ललित यादवले चार रन बनाएर अविजित रहे ।
कोलकाताको इनिङ्स
टस हारेर पहिले ब्याटिङ गरेको कोलकाताको टोली २० ओभरमा १२७ रनमा समेटिएको थियो । कोलकाताको सुरुवात निकै खराब रह्यो र टोलीले सुरुदेखि नै नियमित अन्तरालमा विकेट गुमायो । लिटन दास चार रन, कप्तान नितिश राना चार रन, मनदीप सिंह १२ रन, रिंकु सिंह ६ रन र सुनिल नारायण चार रन बनाएर आउट भए । वेंकटेश अय्यर र अनुकुल रोयले खाता खोल्न पनि सकेनन् ।
एक समयमा कोलकाताले ९६ रनमा ९ विकेट गुमाएको थियो । यी ९६ मध्ये ४३ रन जेसन रोयका थिए । जेसनले ३९ बलमा ५ चौका र एक छक्काको मद्दतले ४३ रनको इनिङ खेले । कुलदीप ह्याट्रिक गर्नबाट चुके । उनले १५ औं ओभरमा लगातार दुई बलमा दुई विकेट लिए । कुलदीपलेजेसनलाई अमन खानबाट क्याच आउट गराएपछि इम्प्याक्ट प्लेयर अनुकुल रोयलाई एलबीडब्ल्यू आउट पारेका थिए ।
उमेश यादव तीन रन बनाएर आउट भए । अन्तिम ओभरमा आन्द्रे रसेलले मुकेश कुमारलाई लगातार तीन बलमा तीन छक्का प्रहार गरे । यी मध्ये एउटा छक्का १०९ मिटरको थियो । वरुण चक्रवर्ती (१) अन्तिम बलमा रनआउट भए । रसेलले ३१ बलमा एक चौका र चार छक्का प्रहार गर्दै अविजित ३८ रन बनाए ।
दिल्लीको बलिङतर्फ २३ महिनापछि आईपीएलमा खेल खेलेका इशान्त शर्माले शानदार पुनरागमन गरेका छन् । उनले चार ओभरमा १९ रन दिएर दुई विकेट लिए । यसबाहेक एनरिक नोर्ट्ज, अक्षर पटेल र कुलदीप यादवले पनि २–२ विकेट लिए । मुकेश कुमारले एक विकेट लिए ।
दिल्लीको इनिङ्स
१२८ रनको लक्ष्य पछ्याएको दिल्लीको टोलीले उत्कृष्ट सुरुवात गरेको थियो । कप्तान वार्नरले उत्तेजित ब्याटिङ गर्दै पहिलो चार ओभरमा ३४ रन बनाए । तर, पृथ्वी शाको खराब फर्म जारी रह्यो । उनी ११ बलमा १३ रन बनाएर आउट भए । यसपछि मिचेल मार्सले पनि खास केही गर्न सकेनन् र दुई रन बनाएर आउट भए ।
डेब्यु खेल खेलेका फिलिप साल्टले पाँच रन बनाउन सके । यसपछि मनिष पाण्डे र वार्नरले चौथो विकेटका लागि २६ रनको साझेदारी गरे । यसैबीच, वार्नरले आफ्नो आईपीएल करियरको ५९ औं अर्धशतक बनाए । योसँगै उनको यो सिजनको चौथो अर्धशतक हो । वरुण चक्रवर्तीले वार्नरलाई एलबीडब्ल्यू आउट गरे । उनी ४१ बलमा ११ चौकाको मद्दतले ५७ रन बनाएर आउट भए ।
मनिष पाण्डे २३ बलमा २१ रन बनाएर आउट भए भने अमान हाकिम खान खाता नखोलेर पेभिलियन फर्किए । अन्त्यमा अक्षर पटेल र ललित यादवले दिल्लीलाई जित दिलाए । अक्षरले २२ बलमा एक चौकाको मद्दतले १९ रनमा अविजित रहे भने ललितले अविजित चार रन खेले । कोलकाताका लागि वरुण, अनुकुल रोय र नितिश राणाले २–२ विकेट लिए ।
कोलकातामाथि दिल्लीको यो लगातार तेस्रो जित हो । यसअघि सन् २०२२ मा टोलीले कोलकातालाई लगातार दुई खेलमा पराजित गरेको थियो ।
२३ महिनापछि आईपीएल खेल्दै आएका इशान्त शर्मा उत्कृष्ट बलिङका लागि प्लेयर अफ द म्याच घोषित भए । इशान्तले यसअघि मे २, २०२१ मा पञ्जाब किंग्सविरुद्ध अन्तिम खेल खेलेका थिए।
जारी सिजनमा दिल्लीको पहिलो जित हो । यसअघि टोलीले लगातार पाँच खेलमा हार बेहोरेको छ । उसको छ खेलमा एक जित र पाँच हारसहित दुई अंक छ । टोली अंक तालिकाको पुछारमा (१० औं) स्थानमा छ ।
योसँगै कोलकाता नाइट राइडर्सको ६ खेलमा यो चौथो हार हो । टोली दुई जित र चार अंक जोडेर आठौं स्थानमा छ । राजस्थान आठ अंकसहित शीर्ष स्थानमा छ । लखनउ पनि ८ अंकसहित दोस्रो स्थानमा छ । यस्तै, चेन्नई सुपर किंग्स ६ अंकसहित तेस्रो स्थानमा छ ।
