काठमाडौँ । एसिसी प्रिमियर कप एकदिवसीय क्रिकेट प्रतियोगिताअन्तर्गत ओमानले विजयी सुरुवात गरेको छ ।
मुलपानी क्रिकेट मैदानमा भर्खरै सम्पन्न खेलमा ओमानले कतारलाई ४० रनले पराजित गरेको हो । ओमानले दिएको २५० रनको विजयी लक्ष्य पछ्याएको कतारले ४७.२ ओभरमा अलआउट हुँदै २०९ रनमात्र जोड्यो ।
कतारका मोहमद रिजलानले ४३, खुराम शाहजाद ३०, इकरामुल्लाह खान २६, इमाल लियांगे २७, मुहम्मद तनवीरले १९ रन जोडे ।
बलिङतर्फ ओमानका विलाल खानले चार, जय ओडेड्रा र अकिव इलियासले दुई–दुई तथा जिसन मक्सुदले एक विकेट लिए ।
त्यसअघि टस हारेर पहिले ब्याटिङ थालेको ओमानले निर्धारित ५० ओभरमा ८ विकेटको क्षतिमा २४९ रन जोडेको थियो । ओमानका लागि आयान खानले ६४ रनमा अविजित रहँदै अर्धशतकीय इनिङ्स खेले । यस्तै, जिशन मक्शुद ४१, सन्दीप गोउद ३४, कश्यप प्रजापती र मोहम्मद नदिमले १८/१८ रन जोड्दा जतिन्दर सिंह र आदिल साफिकले १६/१६ रन जोडे । अकिव इलियासले १७ रनको योगदान दिए ।
बलिङतर्फ कतारका मुहम्मद मुराद र आमिर फारुकले तीन–तीन विकेट लिँदा इकरमुल्लाह खानले दुई विकेट लिए ।
