कोलम्बो । श्रीलंकामा प्रधानमन्त्री रनिल विक्रमासिंघे देशको कार्यवाहक राष्ट्रपति बनेका छन् । राष्ट्रपति गोटाबाया राजापाक्षे मुलुक छोडेर भागेपछि विक्रमासिंघे कार्यवाहक राष्ट्रपति बनेका हुन् ।
श्रीलंकाले इतिहासकै सबैभन्दा खराब आर्थिक संकटको सामना गरिरहेको छ । स्थिति नियन्त्रण बाहिर छ । प्रदर्शनकारीहरू प्रधानमन्त्री निवास नजिकै भेला भइरहेका छन् र उनीहरूलाई नियन्त्रण गर्न सुरक्षाकर्मीको पसिना बगिरहेको छ ।
कार्यवाहक राष्ट्रपति बनेपछि विक्रमासिंघेले अब आफ्नो शक्ति प्रयोग गरेर संकटकाल घोषणा गर्न सक्ने विश्वास गरिएको छ । पछिल्लो घटनाक्रममा देशको पश्चिमी प्रान्तमा कर्फ्यू लगाइएको छ । गलेको विरोधस्थलमा दुई संगठनबीच भएको झडपमा चारजना गम्भीर घाइते भएका छन् र उनीहरुको उपचार भइरहेको छ ।
राजपाक्षेले दिए जानकारी
राष्ट्रपति गोटाबाया राजापाक्षेले प्रधानमन्त्री रनिल विक्रमासिंघेलाई देशको कार्यवाहक राष्ट्रपतिमा नियुक्त गरेको संसद्का सभामुखलाई जानकारी गराएका छन् ।
सभामुख महिन्दा एबेवर्दानाले एक विशेष विज्ञप्ति जारी गर्दै हाल देशबाहिर रहेका राष्ट्रपतिले आफ्नो स्थानमा रनिल विक्रमासिंघेलाई कार्यवाहक राष्ट्रपतिमा नियुक्त गर्नुभएको जानकारी दिए । विक्रमासिङ्घेलाई धारा ३४ (०१) बमोजिम कार्यवाहक अध्यक्ष बनाइएको सभामुखले जानकारी दिए ।
राजधानी कोलम्बोका विभिन्न स्थानमा प्रदर्शनकारीले सरकारविरुद्ध प्रदर्शन गरेका छन् । देशको वर्तमान आर्थिक अवस्थालाई ध्यानमा राख्दै राष्ट्रपति र प्रधानमन्त्री दुवैले तत्काल पद छाड्नु पर्ने आन्दोलनकारीको माग छ ।
राजापाक्षेले जुलाई १३ मा आफ्नो पदबाट राजीनामा दिने बताएका थिए तर त्यसअघि नै उनले देश छोडेका थिए । राष्ट्रपति आफ्नो परिवारसँग माल्दिभ्समा छन् र उनले यसबारे कसैलाई भनेका छैनन्।
विक्रमासिङ्घे कुनै नेताको चयन नभएसम्म पदमा रहनेछन् । यसअघि सन् १९९३ मे १ मा राष्ट्रपति आर प्रेमदासाको हत्या भएपछि श्रीलंकामा राष्ट्रपतिको पद खाली भएको थियो।
यसअघि नयाँ राष्ट्रपति चयन गर्न संसदले जुलाई २० मा गोप्य मतदान गर्ने खबर आएको थियो। स्रोतका अनुसार विक्रमासिंघेले वर्तमान राष्ट्रपतिको बाँकी कार्यकाल पूरा गर्न यस पदका लागि प्रतिस्पर्धा गर्नेछन् ।
जुलाई ९ मा विक्रमासिंघे आफैँले ट्विट गरेर सर्वदलीय सरकारको बाटो खोल्न प्रधानमन्त्री पदबाट राजीनामा दिने बताएका थिए ।
जब पहिलो पटक प्रधानमन्त्री बने
श्रीलंकाको एक प्रभावशाली सिंहली परिवारमा जन्मिएका विक्रमासिंघे पेशाले वकिल हुन्। २८ वर्षको उमेरमा उनलाई उप–विदेशमन्त्रीको जिम्मेवारी दिइएको थियो। उनको काम गर्ने क्षमताले छोटो समयमा धेरै नेताहरूलाई प्रभावित पारेको थियो।
५ अक्टोबर १९७७ मा विक्रमासिंघेले पूर्ण मन्त्रिपरिषद्को पद पाए र युवा मामिला मन्त्री बने। उनले सन् १९८० को दशकसम्म यो पद सम्हालेका थिए । विक्रमासिंघे राजनीतिमा अगाडि बढिरहेका थिए ।
सन् १९९३ मा तत्कालीन राष्ट्रपति रणसिंघे प्रेमदासालाई लिट्टे आतङ्ककारीहरूले आत्मघाती हमलामा मारेका थिए। उनको मृत्युपछि प्रधानमन्त्री डिबी विजितुंगालाई कार्यवाहक राष्ट्रपति बनाइएको थियो । ७ मे १९९३ मा विक्रमासिंघेलाई पहिलो पटक देशको प्रधानमन्त्री नियुक्त गरियो।
